Во вторникот во Брисел почина најстариот атлет на Белгија. Врз Емиел Пауелс, 95 години, беше извршена еутаназија која тој самиот ја побара откако одлучи дека прво треба да испие шампањско со своите најблиски.
“Не жалам што треба да заминам” и “воопшто не се плашам од смртта”. Ова се зборовите на Емиел Пауелс кој одлучи да умре по своја желба. Белгија е една од ретките земји каде што еутаназијата е дозволена. Законот беше донесен на 28 мај 2002 година и чинот е признаен како право на секој болен човек да го направи својот избор за крај на животот и смртта доколку самиот се наоѓа во услови кои дозволуваат донесување на оваа одлука.
Белгискиот печат посвети доста простор на еутаназијата на Пауелс. Неколку фотографи и камери беа поканети да ги овековечат последните мигови на животот на овој човек. Кај него, околу неговиот кревет каде што лежеше болен од рак, беа собрани семејството, пријателите и членовите на неговиот атлетски клуб.
“Ова е најубавиот празник во мојот живот. Кој не би сакал да заврши со шампањско, обиколен со неговите блиски?”, рече тој за весникот “Хет Ласте Њус”. Потоа додаде дека “кога докторот ќе дојде со својата инекција, ќе го напуштам овој свет со чувство дека убаво сум живеел. Зошто да плачам кога знам дека ќе ги најдам своите пријателите и блиските како и мојата сопруга во рајот?”, вели Пауелс за репортажата што ја направи телевизијата ВРТ.
Според синот на Пауелс, умирањето било желба на татко му но тој призна дека за него е тешко да замисли дека овој момент е последен што го минуваат заедно.
Пауелс е познат спортист во Белгија каде што постигна многу успеси. Неговиот последен спортски преформанс беше во 2013 година кога тој ја освои титулата на европски ветеран на 60 метри на шампионатот за атлетизам.
На ваков начин побара да умре и познатиот белгиски хемичар Кристијан де Дув, добитник на Нобеловата награда во 1974 година.
Еутаназијата е регулирана со закон и дозволена во околу 15 земји во светот.