Трендот на опаѓање на учениците и бројот на децата во Република Македонија е загрижувачки, изјави министерката за образование Рената Треневска Дескоска на првиот училиште ден во Куманово.
– За жал се забележува опаѓање на бројот на деца коишто се запишуваат и во средното образование и покрај тоа што е задолжително, што покажува на трендот за иселување на млади луѓе од државата, семејства со деца во образовен процес. Се надеваме дека процесот на иселување на младите ќе запре, Министерството за образование и наука ќе направи реформи кои ќе значат враќање на квалитетот на образованието и правење на образованиот систем во Македонија атрактивен за учениците, како би останале овде и би го продолжиле своето образование – рече Дескоска.
Во Куманово оваа година се запишале 1.200 првачиња, седумдесет помалку од лани, а во прва година во средните училишта 1.100 ученици или 200 помалку од минатата година.
– Денеска на првиот училишен ден решив да присуствувам на неколкуте свечености што се организираат во Општина Куманово, бидејќи во оваа општина има најголем број ученици, со најголем број првачиња. Дојдов и во средното стручно училиште, со цел да го промовираме стручното образование. Освен медицинското, економското и правното, другите насоки на стручно образование се запоставени и не се атрактивни за учениците. Се надевам дека со измените што ќе се направат со наставните програми ќе поставиме систем кој ќе ги привлече учениците. Правиме напори и договор со компаниите да се овозможи практична настава на учениците, со цел да им овозможи настава која ќе ги прави способни на пазарот на трудот -рече министерката.
Според неа, во минатото образованието во Куманово било препуштено само на себе, без поддршка за капитални инвестиции од страна на Министерството за образование.
– Целта на оваа влада е да не прави разлика меѓу градоначалници од власт и опозиција бидејќи интересот на децата треба да биде пред се – рече Дескоска.
Посетата на градот Куманово од страна на министерката Дескоска не беше случајна. Оваа година, Куманово има најголем број на запишани првачиња, околу 7,5 проценти од целокупниот број на првачињата во Република Македонија.
Дополнително, министерката Дескоска беше во посета на средното училиште „Перо Наков”, каде учениците учат на македонски и на албански наставен јазик. Министерката оттаму порача: „соживотот, другарувањето меѓу учениците од различни етнички заедници е она што треба да биде усвоено како вредност во текот на образовниот процес”.
Министерката преку отворено писмо до јавноста им го честиташе почетокот на новата учебна година на учениците, наставниците и професорите.