Најмалку 16 загинати и двајца повредени е билансот од утринскиот напад врз ресторан во Каиро.
Како што јавуваат светските медиуми, нападот бил со молотов коктел, што го фрлил маскиран човек, по што настанала експлозија.
Ресторанот се наоѓа во центарот на Каиро, во квартот Агуза, а сите настрадани се вработени во ресторанот. Наводно се работи за тројца напаѓачи кои се во бегство.
Египетските безбедносни служби претпоставуваат дека можна причина за нападот е што еден од напаѓачите бил вработен во ресторанот од каде што добил отказ.
Засега никој не ја презеде одговорноста за овој напад, иако за сите претходни напади од 2013 година наваму, одговорноста ја презедоа милитантите од Исламската држава. Последниот терористички напад во Египет беше уривањето на рускиот патнички авион на Синај, за кој одговорноста исто така ја презедоа исламските милитанти.