Овие тимови создадени на училиште остануваат до крај на животот. Научете што да очекувате од другите и да го давате својот максимум. Тоа е тајната на успехот, изјави градоначалникот на општина Кисела Вода, Филип Темелковски.
Започна новата учебна година за сите ученици од основните училишта од општина Кисела Вода. Со физичко присуство, но и со запазување на пропишаните здравствени протоколи, 5.385 основци го одржаа првиот училиштен час. Меѓу нив и видно возбудени 648 првачиња, кои за првпат седнаа во училишните клупи, информираа од општината.
Градоначалникот Филип Темелковски, кој посети дел од училиштата на првиот ден од новата учебна година, им посака успешна учебна година и во радост и во среќа да ги минуваат училишните денови, потенцирајќи дека освен стекнатото образование еднакво важни се и спомените и другарството од училишните клупи и дека тие се вредност што останува за цел живот.
– Ги поздравуваме и им посакуваме успех и среќа и безгрижни денови на училиште на сите ученици и нивните семејства. За наставниците знаеме дека ќе бидат на висина на задачата и ќе создадат уште една генерација успешни младинци со кои ќе се гордееме. Почитувајте се, помагајте си, внимавајте еден на друг. Понекогаш полесно се учи во група и во тим. Овие тимови создадени на училиште остануваат до крај на животот. Научете што да очекувате од другите и да го давате својот максимум. Тоа е тајната на успехот, изјави градоначалникот на општина Кисела Вода, Филип Темелковски.
Во Чаир насмевки и од 919 првачиња
Нема ништо подобро отколку да се слушне гласот и да се види насмевката на лицата на децата. Денес, кога учебната 2021/2022 година започна со физичко присуство за сите ученици од основните и средните училишта, градоначалникот на Општина Чаир, Висар Ганиу, беше меѓу децата на општинското основно училиште „Тефејуз“, соопштија од општината.
За првпат 919 деца седнаа на училишните клупи во училиштата на Општина Чаир. Градоначалникот Ганиу со директорот на „Тефејуз“, Салајдин Зекир и со поранешниот наставник по физичко образование, Али Садетин-Сетко, денеска учествуваа во приемот на учениците од првото одделение во ова училиште и заедно го слушнаа првото ѕвонче. Целиот процес започна според протоколите предвидени од релевантните министерства и здравствените власти.
И сите други училишта во Општина Чаир успешно ја започнаа новата учебна година, како резултат на бројните подготовки што беа направени во текот на изминатиот период, со цел децата да бидат што е можно посигурни во училишните клупи, а притоа да се спречи ширењето на вирусот ковид-19.
– На сите ученици кои седнаа за првпат денес во училишните клупи и на оние што се вратија во училиштата по долга пауза поради пандемијата, им посакувам многу успех, бидејќи само светлината на знаењето е она што може да нѐ води напред, изјави Ганиу.
Тој упати порака заеднички да ги почитуваме преземените мерки за да спречиме ширење на пандемијата, бидејќи само на овој начин училиштата ќе останат со отворени врати без прекин.