Наташа Габер-Дамјановска е реизбрана за директор на Академијата за судии и јавни обвинители. Габер-Дамјановска беше избрана со осум гласа за и еден воздржан на денешната седница на Управниот одбор на Академијата.
Во трка за директор на Академијата беа уште тројца кандидати, судиите Ненад Савески, кој доби три гласа „за“, пет „против“ и еден „воздржан“ и судијата Андреј Димовски за кого имаше девет гласа „против“. За судијката Емилија Шопар-Јованова не се гласаше, поради неисполнување на условите.
Ова е втор четиригодишен мандат на Габер-Дамјановска. Таа е поранешна уставна судијка и директорка на Институтот за социолошки и политички правни истражувања, а за директорка на Академијата прв пат беше избрана во ноември 2018 година.
Согласно Законот за Академијата за судии и јавни обвинители директорката Наташа Габер својата функција ја извршуваше до 30 ноември 2022 година, а Управниот одбор на Академијата, кој ден претходно ја одржа конститутивната седница го назначи Зоран Герасимовски член на УО за вршител на должноста директор, кој пак пет дена подоцна даде оставка.