Да не постеше НАТО ќе моравме да го направиме. Ова се зборовите на новиот министер за одбрана на САД Џејмс Метис за време на неговиот настап пред Сенатот пред неколку дена.
Оваа реторика на новиот шеф на одбраната на САД се потврди и со телефонскиот повик на Метис до генералниот секретар на НАТО Јенс Столтенберг во понеделникот.
На првиот работен ден на оваа функција Метис крена телефон за да разговара со шефот на НАТО како гест на добра волја кој треба да го смири незадоволството во Европа по изјавите на Доналд Трамп дека НАТО е застарена организација.
За време на изборната кампања Трамп често го доведуваше во прашање учеството на САД во НАТО поради фактот што многу земји членки на алијансата почиваат на САД и не се доволно финансиски ангажирани во организацијата за колективна одбрана.
Метис, кој е генерал во пензија, имаше сосема друг тон во разговорот со Столненберг ако може да се цени по соопштението на НАТО по разговорот.
Столтенберг му честитал на Метис за именувањето и двајцата се согласиле околу “фундаменталната и трајна вредност на НАТО за безбедноста на Европа и Северна Америка”. Тие разговарале и за начинот како да се натераат сојузниците да трошат повеќе за безбедност и како да се зајакне борбата против тероризмот.
“Имав одличен разговор со секретарот Метис денес – тој е силен пријател на НАТО во Пентагон. Секретарот Метис ги знае вредностите на алијансата бидејќи бил врховен командант за трансформација на НАТО. Ја очекувам можноста да му посакам добредојде назад во семејството на НАТО и да го видам на следниот состанок на министрите за одбрана во февруари”, соопшти првиот човек на алијансата.