Навивач на Северна Ирска загина во Франција за време на одржувањето на Европското првенство во фудбал.
Според полицијата, човекот кој бил на возраст од околу 20 години, починал во саботата откако паднал од шеталиште на висина од 8 метри врз карпа.
– Најверојатно бил пијан. Додека шетал ја поминал оградата и паднал, изјавил портпаролот на полицијата, пренесуваат француските медиуми.
Несреќата се случил по натпреварот помеѓу Полска и Северна Ирска кој заврши 1-0.
Насилството помеѓу навивачите а не опасноста од тероризам ненадејно стана најголемата закана за безбедноста во Франција. Уште од првиот ден од почетокот на Европското првенство во фудбал, хулиганите дивеат низ улиците.
Сличен инцидент имаше и во Марсеј, каде што англиски навивач прво беше истепан од руски навивачи, а потоа и фрлен од пристаништето во морето. Сепак тој остана при свест и успеа да доплива до копно.
Насилствата започнаа во Марсеј, со Англичаните и Русите, за потоа Германците и Украинците да се пресметаат во Лил.
Како резултат на ова, француската Влада одлучи во градовите во кои се одржуваат натпреварите од Европското првенство да се забрани продажбата на алкохол во близина на стадионите и навивачките зони.