Попладнево, непознат администратор ја измени содржината на англиската верзија на биографијата на министерот за надворешни работи Бујар Османи на познатата интернет енциклопедија Википедија. Му го избриша името и наместо Бујар Османи го напиша Бугар Осамени.
Кратко време на страницата покрај сликата наместо името стоеше „Бугар Осамени“, па потоа и во описот беше додадено known as a Bugar Osmanov (познат и како Бугар Османов).
Само во текот на 40-тина минути, имало 12 промени на страницата на Wikipedia на англиски јазик. За споредба толку промени имало од почетокот на годинава до денес.
Симптоматично е и што повеќе ФБ профили објавија фотографии од промената на податоците за Османи во истиот период.
Администраторите многу бргу реагираа за да ги отстранат навредливите содржини на најпознатата интернет енциклопедија и да ги вратат оригиналните.
Во моментот, повторно е вратена оригиналната содржина и навредите се избришани.
За разлика од англиската верзија на профилот на Османи која има опширна содржина, македонскиот профил на Wikipedia има само неколку податоци за образованието и лекарската кариера и се уште го води како „политичар и поранешен министер за здарвство“, иако во хронологијата на функциите сепак е наведено дека е министер за надворешни работи. (Р.Н.)