Македонските и хрватските љубители на фудбалот вчера беа лути затоа што немаше ТВ пренос на натпреварот Вардар – Динамо којшто се одржа на македонската арена „Филип втори“. Шефот на спортската програма на хрватскиот јавен сервис, Бруно Ковачевиќ, денеска изјавил дека пренос немало затоа што сопственикот на Вардар кој ги има правата им барал три до четири пати повеќе пари од вообичаената сума.
-Сопственикот на Вардар преку својот посредник ни побара 3,5 пати повеќе пари од она што било кога сме го платиле во историјата на преносот на второ претквалификациско коло за Лигата на шампиони, изјави Ковачевиќ.
Хрватските медиуми шпекулираат со цифри од 50, 000 евра кои биле побарани од Самсоненко. Македонскиот јавен сервис кој вчера беше на мета на напади не излезе официјално да објасни зошто не го пренесуваше натпреварот, но нивни вработени коментираа дека Самсоненко барал многу пари и од МТВ.
Портпаролот на клубот „Вардар“ и новинар во „Македонски спорт“, Горан Бошев, за НОВА ТВ ја потврди информацијата дека парите биле проблем за преносот, но не навлезе во детали околу неуспехот на преговорите со ТВ куќите.
-Не успеавме да се договориме со ниту една телевизија, имаше преговори со една македонска приватна телевизија, но не дојде до заеднички договор, а исто и со хрватскиот јавен сервис. Причина беа парите, рече Бошев.
Вардар загуби, Самсоненко славеше
Македонскиот фудбалски шампион „Вардар“ вчера изгуби на домашен терен со резулат од 1:2 на вчерашниот дуел со клубот „Динамо“ од Загреб. И покрај поразот, хрватските медиуми денеска пишуваат дека тоа не го спречило сопственикот на „Вардар“ Сергеј Самсоненко да ја прослави победата на гостите во еуфорична атмосфера во еден скопски ресторан на негова сметка.
Хрватските фудбалери своето воодушевување од пречекот на Самсоненко го споделиле со хрватските медиуми велејќи дека „никој никогаш вака не ги пречекал“ и дека по забавата биле вон себе. Самсоненко бил на својата четириесетметарска јахта закотвена на островот Вис во Хрватска, но решил да се врати во Скопје и да ги дочека хрватските фудбалери, пишува спортската редакција на „Јутарњни вести“.
„Приреди невиден спекакл. Имаше серии од превкусни јадења, а тогаш дојде врвот. Самсоненко го зема микрофонот и почна да пее. Глас како од Суперталент. Да се натпреваруваше ќе победеше. Се вклучија и неговите соработници и други Македонци, домашни луѓе и сите му наздравуваа на Динамо. Почна да пее стихови од Тоше, како самиот Тоше да воскресна. Музичарите свиреа, Самсоненко редеше стихови. На песната „Ти си ми во крв“ од Здравко Чолиќ тој во стиховите ги вклучи Динамо и Торцида, Армада (навивачки хрватски групи). Исто така, за време на прославата развеселиот Самсоненко искршил и 50 чинии.