Со претставата „Не се срамам од моето комунистичко минато“ на реномираната театарска режисерка и актерка Сања Митровиќ и српскиот актер Владимир Алексиќ во 20 часот во МКЦ, се спушта завесата на овогодинешниот МОТ 42.
Во „Не се срамам од моето комунистичко минато“, реномираната театарска режисерка и актерка Сања Митровиќ и српскиот актер Владимир Алексиќ се осврнуваат на неодамнешната историја на Социјалистичката Федеративна Република Југославија, земја, која денеска постои само во имагинацијата и сеќавањата. А сепак, основната идеја на СФРЈ, како мултиетничка, мултирелигиозна социјалистичка држава, е сè уште актуелна битка на европските земји денес. Или барем тоа е уверувањето што ги споило овие двајца артисти и пријатели од детството, кои емигрирале во 2001 година. Додека Сања сѐ уште живее и работи во Западна Европа, Владимир се вратил во Србија, за одново да го гради својот живот таму.
Во џебното кино МКЦ, во 11 часот, во рамките на 42. издание на МОТ, ќе се одржи презентација на тема Подобра публика и подобри граѓани преку воведување на задолжително Театарско образование во Македонија.
Театарското образование во Македонија е воведено во 2001/02 година, со воведување на предметот Драмска уметност во рамките на реформираното гимназиско образование. Оттогаш, па до сега, наставниот план по овој предмет е изменет само еднаш. Театарското образование во светот се јавува во 1953 година, се поставува прашањето зошто македонскиот образовен систем доцни?
МОТ смета дека преку задолжителното изучување на театарската уметност во сите средни училишта во Македонија, не само што би можело да се создаде нов бран на театарска публика, туку и да се влијае врз развојот на идното граѓанство и идните генерации.
Презентацијата ќе ја води м-р Милош Б. Андоновски, театарски режисер со педагошки доквалификации и професор по театарска уметност. Во рамките на презентацијата, ќе бидат претставени и резултати од истражувањето на Андоновски, за влијанието на театарската уметност врз развојот на личноста на средношколците.