Влијателниот „Њујорк тајмс“ во истражувачка сторија силно ја нападна Бил, Хилари и Челзи Фондацијата- на поранешниот претседател Бил Клинтон, неговата сопруга и веројатен кандидат на претседателските избори во 2016 година Хилари, како и на нивната ќерка Челзи. Насловот на текстот е- Нелагодност во Клинтон Фондацијата- за амбиции и финансии
Весникот ја истражува улогата на Фондацијата, за која пишува дека служи како расадник за советници на Хилари Клинтон за кампањата за која веќе се подготвува, но и како начин за собирање на пари и оддржување на блиски но и контроверзни врски со бизнисмените.
„Њујорк тајмс“ ги испитува врските на Фондацијата, која треба да промовира хуманитарни проекти во САД и низ светот, со консултантската компанија „Тенео“ на долгогодишниот советник на Клинтон, Даглас Бенд, кој работи со крупни клиенти, меѓу кои и финансиски корпорации вмешани во скандали. Бенд во текстот се нарекува сурогат-син на Бил Клинтон.
Бенд влезе во светот на консултантските услуги, односите со јавноста и трговското банкарство и ангажираше директори од Вол Стрит и советници на Клинтон за „Тенео“. Компанијата работеше на апанажа, добивајќи клиенти кои плаќале и до 250.000 долари месечно. Промотивните документи на Тенео ги истакнуваа врските на Бенд со Клинтон, пишува „Њујорк тајмс“.
Најоспорувана зделка на компанијата е работата со финансиската компанија „МФ Глобал“ на поранешниот гувернер на Њу Џерси, Џон Корзин. Со банкротот на оваа компанија во 2011 година снема 1,6 милијарди долари од влоговите на нејзините клиенти.
„Њујорк тајмс“ пренесува новинарски текст дека Хилари Клинтон била гневна поради соработката на „Тенео“ и нејзиниот сопруг со „МФ Глобал“, за да се спречи нејзино поврзување со големиот финансиски скандал.
Сепак и други проблематични компании биле клиенти на „Тенео“, како британската финансиска корпорација „Стандард Чартерд“, која плати казна од 340 милиони долари поради перење пари за потребите на режимот на Иран.
Медиумите во САД потсетуваат дека Бил Клинтон, на самиот крај на својот мандат во Белата куќа го помилуваше познатиот нафтен трговец Марк Рич, кој беше во бегство под обвинение дека избегнувал да плати данок и работел со иранските власти, поради што евентуалните врски на фондацијата со контроверзни бизнисмени предизвикуваат интерес.
Паралелно со профитните бизниси на „Тенео“, Фондацијата на Бил, Хилари и Челзи Клинтон работи на поврзување на големи корпорации со хуманитарни проекти кои би ги финансирале.
Кредитните компании од САД биле поканети од поранешниот претседател да работат на обезбедување поефтини кредитни линии во сиромашните населби на американските градови, „Проктер и Гембл“ донирал средства за прочистување вода за земјите во развој, Јужна Африка добила значително поевтини лекарства против сида со поддршка на Хилари Клинтон.
Во раните подготовки за изборите во 2016 година, Фондацијата се претвора во изборен штаб на Хилари Клинтон, пишува Њујорк тајмс, со проширување во поголеми простории на Менхетн, и ангажирање на некои од нејзините помошници во Стејт департментот, меѓу кои е и Хума Абедин, сопругата на кандидатот за градоначалник на Њујорк, Ентони Винер, чија кандидатура беше погодена од серија секс скандали.