Штотуку завршија преговорите помеѓу ССМ и Владата, но безуспешно – нема договор, дознава НоваТВ, а тоа значи дека од утре јавниот сектор стапува во генерален штрајк. Како што нагласуваат од Синдикатот, не се исполнети нивните барања за линеарно зголемување на платите на вработените во јавниот сектор за 2.806 денари и враќање на правото за регрес за годишен одмор почнувајќи од 2023 година.
Вонредната средба помеѓу претставниците на ССМ и Владата се одржа пред да почне денешната владина седница, но, за жал, без договор околу барањата на синдикалците.
Од Сојузот на синдикати на Македонија појаснуваат дека согласно правилата за време на генералниот штрајк ќе обезбедат расположив капацитет од 10 проценти од вработените во овој сектор.
Штрајкувачкиот одбор – Претседателството на ССМ на седница што се одржа на 17 јуни утврди правила за производно одржувачки и нужни работи кои не смеат да се прекинуваат за време на штрајк.
ССМ, нагласуваат оттаму, имајќи предвид дека води сметка и во сложени услови на генерален штрајк да бидат запазени правилата со цел за вршење на работите кои се неопходно потребни заради спречување на загрозување на животот, личната сигурност или здравјето на граѓаните (нужни работи), на денешната седница, Штрајкувачкиот одбор – Претседателството на ССМ утврди правила за производно одржувачки и нужни работи кои не смеат да се прекинуваат за време на штрајк.
На седница на Комисијата за финансирање и буџет вчера не помина амандманот на ССМ на ребалансот на Буџетот со кој требаше да се обезбедат средства за линеарно покачување на платите.
(Љ.Б.)