Нема епитет кој не ми го спомнавте на лична основа. Ако мислите дека треба на такво ниво да се спуштиме, јас нема да дозволам. Да се погледне во огледало секој што ќе стане да го обвинува другиот, рече собранискиот претседател Талат Џафери во своето обраќање пред пратениците за интерпелацијата што ја поднесе опозициската ВМРО-ДПМНЕ.
– Секој сам да се преиспита што е што во нештата, кога ќе се спорат фактите и аргументите. Нема да дозволам да се узурпира Собранието. Нема да дозволам да се вратат сликите од 27 април. Јас не ги отворив вратите да ги загрозам животите на луѓето, рече Џафери.
ВМРО-ДПМНЕ во интерпелацијата наведува дека спикерот Талат Џафери со серија погрешни постапки направил повреда на собранискиот Деловник и како што од говорницата рече пратеникот Никола Мицевски и покрај добрите работи што ги направил факт е дека тој ја попречувал опозицијата во собраниските дебати.
– Во дискусии, со злоупотреба на европското знаменце, со злоупотребата на скратените постапки, Деловникот, вие имате сторено огромна повреда на Собранието. Очекувам сите пратеници кои потајно коментираат, вечерва до полноќ да гласаат за интерпелацијата, рече Мицевски.
Деловникот пропишува претресот по интерпелацијата да трае еден работен ден, до исцрпувањето на листата на пријавените пратеници за збор, а гласањето е на полноќ.
Седницата ја води Горан Мисовски, потпретседателот на Собранието.
С.М.