„Што ѝ ветил Талат Џафери на делегацијата од Чеченија која била во посета на Собранието?“ е прашање кое нема одговор затоа што претседателот немал средба со делегација од Чеченија, велат од кабинетот на собранискиот претседател Талат Џафери по обвинувањата на пратеникот Антонио Милошоски дека во јули лани Џафери имал средба со чеченска делегација која била и во посета на Тетово.

Милошоски во објавата уште вели дека на собраниската веб-страница нема информации за овој настан, но од кабинетот на собранискиот претседател го тврдат сосема спротивното и велат дека Џафери имал средба со делегација од Европскиот муслимански форум, а содржината на разговорот на мултилатерално ниво, како и секогаш е објавена во веста на интернет страницата на Собранието.

„Пред одржување на средбата, според вообичаената пракса Собранието доби и позитивно мислење од МНР на Република Северна Македонија за одржување на средбата и информација дека делегацијата е примена од страна на претседателот на Собранието на Србија, а во 2018 година од страна на претседателот Иванов“, се вели во соопштението.

Во прилог на ова од Кабинетот на Џафери ја приложуваат информацијата за средбата на следниот линк.

„Во време кога Европа и светот одржуваат конференции за борба против лажни вести и дезаинформации, пратеник се впушта во лиферување на вест која апсолутно е неточна и има за цел да нанесе штета не само на претседателот Џафери, туку и на Собранието и на државата, се вели во реакцијата од Кабинетот на собранискиот претседател.