Две жени замрзнаа на над 4.000 метри надморска височина на Алпите, во близина на границата меѓу Италија и Швајцарија, соопштија денеска спасувачите од регионот Аоста, во северозападна Италија. Мажот, кој бил со повредените жени, вчеравечер бил пренесен во Швајцарија, со хипотермија и смрзнатини.
Тројцата се качувале на планинскиот масив Монте Роса на Пенинските Алпи, чиј највисок врв е Дуфурспице, на над 4.630 метри надморска височина.
Спасувачките служби наведуваат дека жените се воделе како исчезнати лица. Пронајдени биле на италијанската страна на Винсентската пирамида, малку понискиот врв, и однесени во една колиба. Но, екстремните временски услови и силниот ветар ја отежнувал операцијата за нивно спасување.
Спасувачките екипи безуспешно се обиделе да ги оживеат двете жени.