Владата на денешната седница донела решение за распуштање на Советот на Општина Тетово, дознаваме од владини извори. Решението е донесено врз база на информацијата поднесена од Министерството за локална самоуправа во која е наведено дека Советот до 31 март не ја усвоил завршната сметка за 2021 година. Тоа, пак значи дека ќе треба да се спроведат во Тетово вонредни локални избори за членови на советот на општината. Одлуката за избори, како и датумот за нивно одржување се во надлежност на претседателот на Собранието Талат Џафери.
Прогнозите се дека Џафери ќе го определи 20 август за датум на изборите, бидејќи на тој ден ќе се одржи гласање и за избор на градоначалници на општините Маврово-Ростуше и Центар Жупа.
Денеска тетовските советници од граѓанската иницијатива Подобро за Тетово реагираа дека ако Владата донесе одлука за распуштање на Советот таа ќе биде правно ништовна, бидејќи се истечени роковите за реакција во однос на завршната сметка на општина Тетово.
Завршната сметка требаше да биде усвоена до 31 март, но советниците од ДУИ, Беса и ВМРО-ДПМНЕ не обезбедија мнозинство за гласање. (Р.Н.)