Во пресрет на состанокот на работните групи за законот за јавно обвинителство што, според најавите, треба да се одржи во 16 часот во Собранието независната пратеничка група од ВМРО-ДПМНЕ реагира дека крајно несериозно е една година неколку луѓе, а не Собранието преку пратениците да имаат разговори зад затворени врати. Новина е дека на попладневниот состанок се повикани претставници на сите пратенички групи.
Од независната пратеничка група за Нова Тв потврдуваат дека ќе присуствуваат на состанокот. Тие досега беа во аут од преговорите, а со оглед на разликите меѓу СДСМ и ВМРО-ДПМНЕ многу веројатно е дека повторно ќе треба да се тропне на нивната врата за да ја одиграат главната ролја во парламентот при носење и на ова исклучително важно законско решение, како во случајот со уставните промени согласно Преспанскиот договор.
„Процесот треба да биде инклузивен, освен ако обете партии не сакаат политички договор наместо добар закон. Од овие причини, и од истакнатата важност на ова прашање од еврокомесарот за проширување на ЕУ, г. Вархеји во контекст за добивање датум за отпочнување преговори со ЕУ, сметаме дека Министерството за правда, уште денес треба да го достави законот во Собрание на разгледување на сите политички субјекти, таму каде што е местото, а не во политичките штабови“, велат од независната пратеничка група.
Тие бараат и претседателот на работното тело кое ќе биде назначено, веднаш да ги исконтактира експертите од областа, граѓанскиот сектор и засегнатите професионалци и итно да закаже јавна расправа во која ќе се вклучат и меѓународни преставници за целосна транспарентност на процесот.
„Според забелешките од јавната расправа, политичките партии да се постават на ниво на државотворни чинители, да се надминат себеси и да понудат решение кое ќе ги приближи нивните ставови. Во духот на владеењето на правото, после таков инклузивен процес, и НПГ како и останатите ќе ги понуди своите размислувања за што подобро законско решение“ велат од НПГ.
Лидерот на СДСМ. Зоран Заев, смета дека има кратко време за носење на законот со оглед дека парламетот се распушта на 12 февруари и има парламентарна процедура пред финалното гласање за законот, поради што недозволиво е повеќе да се одолговлекува ова прашање. Тоа е причината и што во консултација со министерката за правда, Рената Дескоска, одлучиле да ги повикаат на средба пратеничките групи.
„Во комуникација со независните знам дека денеска тие ќе се изјаснат за нивното учество во носењето на законот и за нивните ставови. Уште еднаш напоменувам дека е добро е да учествуваме сите. Полагам сериозна надеж кај пратениците од независната група на ВМРО-ДПМНЕ, но и кај пратениците и од македонската и од албанската опозиција. Полагам сериозна надеж кај парламентарното мнозинство“, изјави денеска Заев, нагласувајќи дека ќе се обидат да обезбедат двотретинско мнозинство, доколку не се усогласат ставовите со ВМРО-ДПМНЕ