Спасувачките екипи се уште трагаат по возачот кој вчера со автомобилот излета од мостот кај Желино и падна во водите на Вардар. Од МВР се уште не знаат по колку лица се трага, дали покрај возачот во автомобилот имало и други патници. Потрагата ја отежнуваат надојдените и заматени води на Вардар.
Голфот 4 со кумановски регистерски таблички вчера со помош на механизација беше извлечен од Вардар неколку часа по несреќата. Потрагата по возачот и евентуални патници ќе трае до крајот на денот, но и следните денови. Информациите дека зад воланот седело 22 годишно момче од Куманово, според полицијата засега се шпекулации.
И Центарот за управување со кризи (ЦУК), соопшти дека се уште се одвива потрагата.
„По добиени податоци од раководителот на Регионалниот центар за управување со кризи (РЦУК) Тетово, од лице место на терен, во потрага до 14.30 биле вклучени пет лица од Полициската станица (ПС) Јегуновце, лица од Црвен Крст-Тетово, четири нуркачи од Дирекцијата за заштита и спасување (ДЗС), пет вработени од Територијалната противпожарна единица (ТППЕ) Тетово, шест вработени од Единицата на локалната самоуправа (ЕЛС) Желино, екипа од РЦУК Тетово“, јавија од ЦУК.
Во меѓувреме во потрагата се вклучи и специјализирана нуркачка екипа од Министерството за внатрешни работи (МВР), како и екипа на Криминалистичка полиција од СВР Тетово на МВР.
На теренот беше екипа од Дирекцијата за заштита и спасување од Кочани со четири лица заедно со четири нуркачи од ДЗС Тетово. Исто така, од 13 часот од Единицата за брзо распоредување (ЕБР) е присутен тим од седум членови, а и други доброволци коишто вршат потрага на двете страни од коритото на реката Вардар. МВР испрати и хеликоптер кој го надлета течението на реката.