Откако загадувањето на Дојранско езеро го решија со менување на Правилникот за води сега можеме слободно да се бањаме и на поплавениот плоштад во Прилеп. Не треба да се испитува надојдената вода од невремето. Се знае. Со новиот Правилник кој стапува на сила од среда водата од трета категорија се претвора во вода со одличен квалитет. Што е тука нејасно?
Дури нема потреба воопшто да ги испитуваат водите. Кога ќе добиеме инфекција на кожата или дијареја и повраќање, сами ќе си знаеме. Ете, мерило. Зошто да се трошат реагенси, Институт за јавно здравје и така нема пари. Ние сме силна нација, ќе се бањаме и во кал ако треба и во фекалии. Се според закон и правилници!
Така се води политика во здравството, што мислевте вие? Па, таму во кабинетот на министерот за здравство има еден сериозен тим и тие веднаш наоѓаат решение за се. Еве на пример, кога ќе испратам прашања за некоја тема се знае однапред, одговор нема, ама демантот е подготвен уште пред да излезе текстот. Неверојатно колку се брзи и вешти. Имаат добар ментор. Па, нели министерот Тодоров едно време бараше и луѓе со висок коефициент, натпросечно интелигентни? За да го советувале, така објасни тогаш.
За волја на вистината проектот му пропадна, такви млади луѓе кај него во кабинет не дојдоа. Мене ми беше чудно како ќе го советуваат ако не се стручни за јавно здравство? Но, на Тодоров очигледно му требале досетливи луѓе, повешти од овие што ги има и плус со висок коефициент на интелигенција. Да бидат мозокот на сите операции! Кога не ги најде се задоволи и со овој тим кој функционира, сто на саат. Ќе го превртат министерството ако треба, демант мора да има. Водата е загадена? Од среда, нема да биде загадена! И точка!
Институциите беа за почит едно време! Особено тие што се занимаваат со научна работа! Сега познати и признати експерти кои се занимаваат со научна дејност се препотуваат за да ви објаснат дека водата од трета категорија која е забранета за капење, од среда ќе биде со одличен квалитет. Тие тоа не го знаеле, еве сега го дознале. И тоа е добро, велат! Нашите правилници биле застарени, па и многу ригорозни. Желбата на еден градоначалник и еден министер за здравство мора да биде исполнета, а власта да остане чиста. Исто како и Дојранското езеро!
Институтот за јавно здравје е во колапс. Тоа е истата онаа институција која ги правеше испитувањата на водата во Дојранско езеро. Сметката е празна и блокирана од извршители. Немаат пари да стават ниту бензин за службените возила, плата не земале втор месец, а прашање е кога ќе престанат да ги вршат испитувањата и превентивни проверки. Залихите на реагенси се трошат, ги има уште за еден месец . Владата за ова знаела уште од април и не превземала ништо. Знаеле и во Министерството за здравство кое се наоѓа еден спрат подолу. И тие не превземале ништо. Можело да се помогне со финансиска инјекција, да се зголеми буџетот, да се зголемат парите за превентивните програми.
Можело дури и да испитаат што се случува таму, да видат како се наталожиле толку долгови. Дали добро се менаџирало? Како се правеле тендерите? Наместо тоа, тие проблемите ги ставиле под тепих. И молчеле. Во моментот кога увидоа дека јавноста ќе дознае за ова, грмело во Министерството за здравство. Имало викање, сослушување, барање начин да се демантира се. Само вистината да не се дознае. Е, па како да им се верува на институциите и на тие што се поставени таму, кои трошат наши пари?
Наскоро во Институтот нема да можат да се прават испитувања на квалитетот на храната, на водата, да се испитува зрачењето, да се вршат превентивни прегледи, хемиски и лабораториски испитувања, ХИВ/СИДА, да се вршат превентивни и санитарни прегледи. Сето тоа можело да се спречи уште во април кога била известена Владата или ако реагирал министерот Тодоров. Можел дури да прозбори за ова со директорот на Институтот кога се среќаваат на скалите наутро. Во иста зграда се.
Алармантна е состојбата во оваа највисока превентивна и научна институција од ваков вид во државата. А, министерот ги крие проблемите.
Слична е ситуацијата во скоро сите македонски болници и клиники кои се дават во долгови. Судски извршни решенија, извршители, закани од веледрогериите дека ќе престанат да испорачуваат лекови, така пулсираат македонските болници. Едни сметки с е исплаќаат, нови постојано пристигнуваат. Како ќе се враќаат натрупаните долгови никој не знае да каже. Во Министерството за здравство оваа тема не е на дневен ред, јавно за ова не се зборува. Важно е дека се купува опрема. Се прават и тендери, централизирани во Министерството за здравство. Како големиот тендерот за реагенси на пример, кој ги стави во грижа 54 здравствени установи. Прашувате, зошто? Затоа што може да банкротираат со десет пати повисоки цени на реагенси. Исто како и Институтот за јавно здравје во моментот.
А, правењето на барокни фасади, градби и мостови си тече континуирано.