Министерот за надворешни работи на Никарагва, Денис Монкада официјално ја известил амбасадорката на Европска Унија (ЕУ) во Манагва, Бетина Мушхејд, за нејзиното протерување од земјата, изјави неименуван дипломатски извор.
Мушхејд ја презеде функцијата во Манагва во октомври 2021 година.
Според никарагванските медиуми, официјална Манагва е лута поради изјавата на претставникот на ЕУ во Советот за човекови права во Женева, кој побара од Владата на Никарагва да ја „врати“ демократијата.
Тоа од властите на Никарагва беше протолкувано како „мешање (на ЕУ) и непочитување на националниот суверенитет“.
Протерувањето на амбасадорката на ЕУ доаѓа седум месеци по протерувањето на апостолскиот нунциј, Валдемар Сомертаг.
Пред четири години, ЕУ и САД воведоа серија санкции за Никарагва и владини претставници поради кршење на човековите права.
Претседателот на Никарагва, Даниел Ортега и неговата сопруга и потпретседателката Росарио Мурило го обвинуваат Вашингтон дека подготвува државен удар во Никарагва со помош на Католичката црква.
Ортега вчера ја нарече Католичката црква „совршена диктатура и совршена тиранија“, две недели откако папата Франциск наведе дека „има дијалог“ со Манагва.