„Можно е денес во Брисел да добиеме документ кој нема да можеме да го прифатиме“, рече претседателот на Србија, Томислав Николиќ за Радио-телевизија Србија.
– Никакви подароци, ни датуми не можат да ја натераат Србија да оди против интересот на својот народ, порача Николиќ.
Претседателот на Србија, Томислав Николиќ изјави дека е можно раководството на државата денес во Брисел да добие документ кој не ќе може да се прифати.
„Претпоставувам дека денес во Брисел, нам ќе ни биде понуден документ, чија содржина ја видов и доколку не се направат измени во тој документ, тој е апсолутно неприфатлив“, изјави претседателот на Србија.
На прашањето каков е тој документ, Николиќ рече дека тоа е нацрт – документ за правата кои би ги имале припадниците на српската заедница во рамките на приштинската администрација, и дека тоа се права кои во Приштина се предвидени со Законот за локална самоуправа.
„Ако со тој документ се гледа јасно дека тие (ЕУ) го признаваат само Косово како држава, а за Србија не водат сметка, тоа значи дека ЕУ нас не не сакаат во својот состав. Во последната година отворивме многу насоки, свесни дека може да се случи некој нас да ни постави ултиматум“, изјави Николиќ.
„Србија никогаш не трпела ултиматуми. Зошто тоа би го направила сега?“, порача српскиот претседател.
Се најавува состанок на Николиќ, премиерот Дачиќ, и потпретседателот на владата, Александар Вучиќ со Кетрин Ештон на тема „надворешна политика и безбедност“.