Претседателот на Србија, Томислав Николиќ во Брисел изјави дека Приштина попуштила по прашањето за надлежност на заедницата на српските општини на Косово и Метохија.
Тој се надева дека спогодбата со Приштина ќе биде потпишана во текот на следните десетина дена.
„Убеден сум дека сме многу блиску и сега зависи од тоа дали луѓето во Приштина се свесни за тоа дека мораат да му помагаат на народот или само на својата политичка кариера“, изјави српскиот претседател.
Прашан дали до 20 март може да се очекува потпишување на некоја спогодба, Николиќ одговори дека може да се очекува уште малку разговор со ЕУ, и доколку се биде подготвено до 20 март – спогодбата ќе биде потпишана на 20 март, а ако биде за 28 март – тогаш ќе биде потпишана.
Според Николиќ, шефицата на европската дипломатија Кетрин Ештон, во разговорите со Приштина ќе има единствен став со Србија околу тоа што може Белград да прифати, а што нема никогаш да прифати.
„Мислам дека ја уверивме дека Србија се придвижува кон ЕУ, дека ќе направи нешто што не беше замисливо пред неколку месеци, но нема да ја признае независноста на Космет“, дециден е Николиќ.
Во врска со идните односи меѓу Белград и Приштина, претседателот изјавил дека тоа се долгорочни односи и дека „не може да се очекува одеднаш да биде избришано се што не раздвојува“.
Во иствореме косовскиот премиер Хашим Тачи ја отфрли изјавата на неговиот српски колега Томислав Николиќ дека Приштина се откажала од своите ставови по прашање на заедниците на српските општини.
Тачи во Собранието на Косово, каде ги информирал пратениците за дијалогот со Србија, рекол дека основа на разговорите биле Уставот и законите на Косово, како и планот на поранешниот пратеник на Обединетите нации, Марти Ахтисари.
Во рамките на дијалогот предвидени се уште две рунди разговори Белград – Приштина, 20 март и 6 април, а 16 април Кетрин Ештон ќе го извести Советот на министри на „ЕУ за резултатите од дијалогот и ќе даде препорака дали Србија треба да добие датум за почеток на преговори со ЕУ.