Српскиот претседател Томислав Николиќ вели „Јужен тек“ е извонреден проект за Србија и енергетска сигурност за земјата.
– Со тој гасовод, Србија конечно обезбедува енергетска сигурност и неговата изградба ќе им понуди работа на нашите градежници, оценува Николиќ.
Тој нагласи дека неговата земја во моментов нема сигурност при снабдувањето со гас, бидејќи го добиваат од Унгарија, додека резервите Србија мора да ги чува во подземни складишта.
Николиќ потенцира дека поради тоа што неговата земја плаќа транзит низ Унгарија, гасот е скап.
Изградбата на „Јужен тек“ вреди 1 милијарда и 900 милиони долари, а половина од парите се српска инвестиција.
– Ние склучивме договор инвестицијата да ја отплатиме од транзитот на гасот преку „Јужен тек“ во Србија. Тоа значи дека добиваме бескаматен кредит кој што ќе го отплаќаме така што ќе им завршиме услуга на Русите, гасот да минува низ Србија, објаснува претседателот на Србија.
Тој потсетува дека за српските градежници ќе има работа во вредност од 600 милиони долари.
>> ЕУ ја притиска Србија да не отпочнува изградба на „Јужен тек“
Овој став на Србија е спротивен со барањата на ЕУ, која неодамна пред презентирањето на Извештајот за напредокот на Србија, потенцираше дека земјата мора да се откаже од изградбата на рускиот гасовод се додека условите за изградбата не кореспондираат со европските закони.