Добивање датум за почеток на преговорите со ЕУ зависи од напредокот во односите со Приштина, порача Штефан Филе, поздравувајќи ја динамиката во дијалогот помеѓу Белград и Приштина. Србија заслужува датум бидејќи направи многу, а потребно е да направи додатно поавеќе на патот кон евроинтеграцијата, изјави претседателот на Србија, Томислав Николиќ.
„Го пренесов ставот дека Србија направи многу и дека е отворена да направи уште повеќе, и оправдано сметаме дека треба да ги почнеме преговорите со ЕУ, како држава која сака да биде член и од тоа да ги извлече и обврските и привилегиите“, додава претседателот.
Според него, Србија е отворена за континуиран дијалог со ЕУ, и прави се за Европската комисија да достави позитивни препораки до националните парламенти на државите членки.
Николиќ нагласи дека Филе освен за процесот на реформи, информирал и за текот на дијалогот со Приштина.
Според еврокомесарот Филе, добивањето датум за почеток на преговорите на Србија со ЕУ, зависи од реформите и напредокот во односите со Приштина.
„Знам дека сите вас ве интересира дали Србија ќе добие датум за почеток на преговорите во јуни. Одговорот на прашањето зависи од напорите во исполнувањето на реформите и од тоа дали ќе биде постигнат видлив и одржлив напредок во односите со Косово“, изјави Филе.
Филе посебно ја поздрави средбата на српскиот претседател Николиќ со претседателката на Косово, Атифете Јахјага.
По Белград, Филе ќе ја посети Приштина