Новиот директор на УБК, Горан Николовски, во обраќање до своите колеги преку јавно писмо, порачува дека е свесен дека сликата за УБК е нарушена, како и негативната перцепција на јавноста, но уверува дека со заедничка работа ќе се изгради нов имиџ на службите, според европски стандарди.
– Случаите на непрофесионалност и злоупотреба треба да бидат минато, свесен сум дека пред нас е период на големи предизвици и реформи, кои најнапред ќе значат инвестиција во самите себе, а на тој начин ќе создадеме служба на здрави основи, која ќе биде подготвена да одговори на сите современи безбедносни закани и ризици создавајќи поволен амбиент за просперитет на нашата држава и нашите граѓани, се вели во обраќањето на Николовски.
Тој потенцира дека е свесен за сериозниот и тежок предизвик и напорниот период кој ќе бара сериозна посветеност и висок професионализам на сите припадници, период во кој нема да има простор за компромиси.
– Заеднички успех ќе биде создавањето на департизирана, модерна, независна, професионална, добро опремена, обучена и ефикасна Служба, во согласност со европските стандарди и под демократска контрола. Нашиот приоритет треба да биде создавање безбедна држава за нашите граѓани преку почитување на демократските вредности и човековите права, а единствено на тој начин ќе го вратиме угледот на службата како респектиран и сериозен партнер во меѓународната безбедносно разузнавачка заедница, порачува директорот на УБК.
Николовски вели отворен е за комуникација на дневна основа за сугестии од своите колеги, како и за забелешки, коментари, проблеми, иницијативи, мислења кои би биле во насока на подобрување на Службата.