Се најавија на секојдневни протести, се заканија со затворање на своите локали и со блокада на влезовите во градот, но ништо од тоа не реализираа денеска. Струмичките угостители се откажаа од намерата за јавно да изразат незадоволство од новите рестрикции против ковид-19 и штетите што ги трпат и не излегоа на улица од, засега, нејасни причини.
Најавениот протест за денеска на струмичките угостители, не се одржа. Иако во нивното соопштение стоеше дека од 11 до 13 часот, секој ден во знак на незадоволство ќе ги блокираат улиците, но и влезовите на градот, во Струмица на улица денес нив ги немаше, пренесува локалната ТВ Вис.
Угостителите во известувањето истакнаа дека трпат најголеми последици од кризата и дека е време Владата да донесе нови мерки што ќе бидат и во нивна корист. Децидни беа дека ги бараат претходните мерки за слободен влез на невакцинирани и вакцинирани.
Засега нема нови најави дека угостителската фела ќе излезе на протест или ќе ги затвори локалите во знак на незадоволство од веќе донесените владини мерки, се наведува во веста на ТВ Вис.