Синодот на МПЦ-ОА не е вознемирен и не сака да ја коментира изјавата на викарот на патријархот на Српската православна Црква Порфириј, моравичкиот епископ Антониј дека му се заканувало раскол на Фанар, односно на Вселенската патријаршија ако го признаела афтокефалниот статус на МПЦ-ОА. Портпаролот на Синодот на МПЦ-ОА, Владиката Тимотеј за НоваТВ, само кусо прокоментира дека „оваа и ваква изјава, ниту е нешто ново ниту е загрижувачко“.
Владиката Петар пак, додава дека „изјавата на викарниот епископ Антониј, не е точна зашто последната одлука донесена на Вселенски Собор и која сеуште е во сила е онаа од втората половина на 8-иот век, а според која афтокефалии доделува Вселенската патријаршија а не Сеправославниот Собор. Дотолку повеќе што Српската Православна Црква, Руската Православа Црква, Бугарската Православна Црква афтокефалии примиле од Вселенската Патријаршија, а не на Вселенски собори. Тука е и Албанската Црква која афтокефален статус добила во 1937 година, Грчката во 1850 , во 1864 Романската Православна Црква и сите тие како Полската и Чешката, афтокефалниот статус го примиле од Вселенската патријаршија и тоа така ќе биде додека не се измени оваа одлука и не се донесе поинаква на Сеправославен Собор. Нешто што не успеа на последните два собора одржани на Крит и во Шамбеси, Швајцарија“, вели за НоваТВ, Владиката Петар,
Како што е веќе познато, Српската православна црква, преку викарот на патријархот Порфириј, епископот моравички Антониј, се закани дека е можен раскол со Вселенската патријаршија ако биде признаена афтокефалноста на МПЦ-ОА.
– Доколку бидат донесени какви било решенија по прашањето на Македонија и Црна Гора, може во најбрзо време да се очекува таква несреќна појава, која може да го наруши евхаристиското општење меѓу Константинопол и Српската црква, рекол епископот Антониј.
СПЦ е во повеќедецениски спор со МПЦ-ОА, оспорувајќи ја нејзината афтокефалност. Разговорите што повремено се водат не доведоа до позитивен исход, поради што МПЦ-ОА за решавање на својот статус се обрати до Фанар и до вселенскиот патријарх Вартоломеј, кој пред пандемијата,најави средба на која би присуствуале претставници и на МПЦ-ОА и на СПЦ, но таква средба досега не е реализирана.
М.Трпческа