Утре во 9 часот ќе се одржи нова рунда преговори меѓу четирите поголеми политички партии.
Премиерот Зоран Заев упатил покани до лидерите на ВМРО-ДПМНЕ, ДУИ и Беса за лидерска средба, трета по ред.
На дневен ред е составот на ДИК, референдумското прашање, датумот на референдумот, но и условите на ВМРО-ДПМНЕ закон за финансирање на партии и „пржинска влада“ се очекува да се најдат на маса меѓу политичката четворка.
По последната лидерска средба не беше постигнат договор околу клучните прашања кои треба да го одблокираат процесот на формирање на ДИК и потоа за одржување на референдум за Договорот со Грција и за интеграција на Македонија во ЕУ и НАТО.
Премиерот и претседател на СДСМ Зоран Заев по лидерската средба во петокот изјави дека разговорите траеле долго и на нив тема биле прашањата кои се суштински поврзани со референдумот, а со тоа и со формирањето на ДИК.
Заев не сакаше да навлегува во детали за кои прашања конкретно ставовите се приближени, а за кои и натаму има големи разлики, туку најави дека на следната средба ќе се разговара сé додека не биде постигнат договор.
Измените на Изборниот законик на дневен ред
Освен познатите барања на опозицијата, се бараат и измени во Кривичниот законик со кои би се овозможило функционери од ВМРО ДПМНЕ да избегнат кривична одговорност. Ниту од ВМРО ДПМНЕ ниту лидерот Мицкоски ова официјално не го потврдуваат, но дека вакво барање постои, наведва и изјавата на премиерот Заев, по минатонеделната лидерска средба, кога рече дека нема да има ниту директнаниту индиректна аменстија.
За утре на дневен ред на Собранието е Предлог-законот за измени на Изборниот законик, откако во петокот тој беше усвоен без расправа по 400 те амандмани поднесени од опозицијата.
Претседателот на Собранието Талат Џафери во интервју за МИА изразува надеж дека лидерите на политичките партии ќе постигнат договор на претстојната средба и дека нема да биде никаков проблем тоа што е договорено Собранието да се спроведе и до крајот на месецот.
– Во спротивно, што не посакувам, процедурата што е започната може да се доведе до крај затоа што нема инструменти за попречување освен ако не мислиме на онаа навика кога ќе треба законот да се носи на потпис кај претседателот на државата па тој да одлучи исто како за двата претходни закони. Тоа веќе е еден од инструментите за попречување, вели Џафери.
Претседателот на Собранието посочува дека за Парламентот нема последен рок за распишување на референдумот бидејќи се уште нема определено датум за негово одржување.