Дубиоза Колектив денеска го претставува новиот сингл насловен „Кажу“, со кој се најавува шестиот студиски албум на бендот. Во рамките на регионалната промоција, радио синглот кај нас премиерно ќе биде емитуван на Антена 5 Радио, додека од утре синглот ќе биде достапен и за онлајн преслушање.
Новиот албум на Дубиоза Колектив, насловен „Апсурдистан“ ќе биде објавен на 15. април. Елекронското издание на албумот ќе биде достапно за бесплатно преземање на веб страницата www.dubioza.org , а истиот ќе има и свое физичкото издание, кое за Македонија ќе биде објавено под етикетата на Пасворд Продакшн и Антена 5 Радио.
„Песната ‘Кажу’ е инспирирана од општоприфатените ‘вистини’ со кои сме секојдневно бомбардирани преку медиумите, рекламите, соседите, блиските и далечните роднини. Тие ‘вистини’ се најчесто засновани на непроверени информации и гласини и имаат малку или воопшто основаност на реални факти. Со помош на магичниот збор ‘велат’ се надоместува недостатокот на аргументи затоа што она што мнозинството (нацијата, соседите, светот) го мисли е веројатно вистина и од поединецот се очекува да го стори токму она што мнозинството го вели.“ – велат членовите на бендот.
За овој сингл подготвен е и анимиран спот, чија телевизиска премиера е закажана за 1 април на регионалниот „МТВ“ канал. На реализацијата на видео спотот работеа аниматорот Тони Хумл и цртачот Филип Андроник.
Дубиоза Колектив во меѓувреме ја продолжува концертната сезона, во чии рамки веќе се закажани повеќе од 30 концерти ширум светот, меѓу кои и настапите на неколку поголеми музички фестивали („Сигет“ во Унгарија, „Шенгенфест“ во Словенија, „Похода“ во Словачка и др.).