Квалитетни , безбедни и ефикасни лекови, произведени во строго контролирани услови насочени да ги задоволат потребите на пациентите. За таа цел, како дел од тие напори е новиот капитален објект „Центар за контрола на квалитет“ на „Алкалоид АД“ кој денеска беше пуштен во употреба.
„Новиот „Центар за контрола на квалитет“ е технолошко-аналитички капацитет кој се простира на површина од 3000 метри квадратни и во него се изведуваат активности кои го покриваат работењето на „ПЦ фармација“ од влез на материјалите за производство до готов фармацевтски производ“, рече Христина Бабунска од „Алкалоид АД“.
Во новиот „Центар за контрола на квалитет“ ќе работат над 100 високо стручни кадри со 26 нови вработувања.
„Успешната приказна на „Алкалоид“ полни осум децении се темели на постојани вложувања, пред се во производна опрема, кадар, знаење и нови технологии. Ако успехот на компанијата се темели токму на супериорниот квалитет на нашите производи, денеска успеавме да ја интегрираме технолошко аналитичката содржина на нашите главни операции. Нашиот нов „Центар за контрола на квалитет“ е капитална инвестиција вредна над 5 милиони евра, а е опремен со високо софистицирана опрема од реномирани светски производители“изјави Живко Мукаетов генерален директор на Алкалоид АД“.
Алкалоид е присутен на пазарите во над 30 земји во светот. Отварањето на овој Центар ја потврдува стратешката определба на компанијата за производство на квалитетни, по цена достапни, безбедни и ефикасни лекови изработени согласно со најстрогите светски стандарди.