Дописникот на весникот Гардијан од Азија Мајкл Сафи на Твитер објави дека и шестото од вкупно 12 деца што повеќе од 10 дена се заробени во пештерата Там Луанг во Тајланд е спасено.
Неколку часа претходно, извор од спасувачката операција и очевидци потврдија дека од пештерата било изнесено лице на носилка завиткано во ќебиња.
Тајландската телевизија емитувала видео во живо како хеликоптер слетува во близина на болницата во Чианг Раи, во близина на местото на пештерата, објави АП.
Од него било изнесено едно лице на носилка, но не можело да се види за кого се работи.
Очевидци претходно изјавија дека амбулантно возило се приближило до влезот на пештерата, и дека се видело како се изнесува личност прекриена со зелени ќебиња, по што спасувачите потврдија дека уште едно дете е извлечено.
Засега нема информации за неговата здравствена состојба.
Спасувачите во провинцијата Чианг Раи на северот на Тајланд влегуваат во пештерата со шишиња кислород и маски за децата, кои потоа ги извлекуваат со помош на јаже кое минува низ кривулестите и тесни премини долги неколку километри.
Спасувачката акција е комплицирана од тоа што дел од децата се непливачи, и мораа да бидат обучувани од страна на тајландски и странски нуркачи пред да се направи обидот за нивно спасување.