Советот за безбедност на ОН денеска попладне ќе одржи итен состанок за Северна Кореја по барање на Токио и Вашингтон, откако Северна Кореја утринава истрела ракета која прелета над Јапонија.
Претходно лидерите на САД и на Јапонија се договорија „да го зголемат притисокот врз Северна Кореја“, посочи јапонскиот премиер Шинзо Абе.
По лансирањето на ракетата, државниот секретар на САД Рекс Тилерсон и јужнокорејската министерка за надворешни работи Кан Кион-хва се согласија да разгледаат построги санкции против Северна Кореја, се наведува во соопштение од Сеул.
Јапонското Министерство за одбрана смета дека ракети, како оние кои беа денеска истрелани од Северна Кореја можат да стигнат до територијата на тихоокеансикиот остров Гуам, каде има воени објекти на САД, изјави министерот за одбрана Ицунори Онодера, пренесува ТАСС.
Според јапонските власти, истреланата ракета прелетала близу 2.700 километри, на висина до 550 километри и паднала во Тихиот Океан. Јапонското Министерство за одбрана смета дека станува збор за ракета со среден дострел, веројатно „Хвасон-12“.
Портпаролот на јужнокорејската претседателска администрација, соопшти дека по лансирањето на ракетата од Северна Кореја борбени авиони на Сеул извршиле вежба со фрлање на бомби на воен полигон.
Јужнокорејската новинска агенција Јонхап цитира неименуван извор од администрацијата на јужнокорејскиот претседател, според кој, Пентагон ја разгледува можноста да распореди стратешки сили на Корејскиот Полуостров.
Според дипломатски извори, Советот за безбедност на ОН има можности да наметне нови санкции на Пјонгјанг. Нафтениот сектор, на пример, беше исклучен од последните санкции наметнати во почетокот на август.
Сепак, експертите наведуваат дека е дискутабилна примената и ефикансноста на санкции, кои имаат за цел да ја седнат Северна Кореја на преговарачка маса, со оглед на тоа дека официјален Пјонгјанг постојано изнаоѓа начини за да ги заобиколи санкциите.
Во саботата, од Северна Кореја беа лансирани три ракети со краток дострел, во море, испукани од нејзиниот морски брег.