Театарот „Арт вени види“ вечерва во 20 часот во Салон 19.19 при Kултурно-информативниот центар во Скопје премиерно ќе ја изведе комедијата ,,Мажачка и тепачка“ од Чехов, во режија на Младен Kрстевски. Во претставата настапуваат Kрстевски, Викторија Анѓушева и Душица Стојановска-Настовска.
– Kомедијата зборува за апсурдот на мажачката на една девојка, која е во поодминати години, и за зетот во поодминати години. Апсурдот на оваа комедија е во тоа што и двете улоги остануваат во себичноста околу поделбата на имотот, кој на крајот ќе им припадне ним. Среќниот крај го разрешува старата мајка Чубукова со шампањ – објаснуваат од театарот.
Претставата е поканета да учествува на Меѓународниот театарски фестивал „Руска класика“ во Москва каде што ќе биде изведена на 30 мај заедно со театри од Иран, Бугарија, Белорусија, Украина и од Германија.