Пред да се породат во породилиштата, на трудниците во Србија им се дава документ за потпишување, во кој го ослободуваат лекарскиот тим, но и институцијата од каква било вина, доколку нешто тргне наопаку при раѓањето на бебето, јави Нова/рс.
На социјалните мрежи се појави документ од породилното одделение на Клиничко-болничкиот центар Звездара, а трудници со кои разговарале о дмедиумот потврдиле дека потписи даваат и во други институции.
Здравствените работници во породилиштата за Нова.рс велат дека потпишувањето на таков документ е вообичаена процедура.
Имено, станува збор за давање согласност на трудницата, идната мајка, која со својот потпис „ги прифаќа сите услови, мерки и хируршки методи поврзани со неочекувани состојби и можни компликации при породување“.
Сопругот/партнерот исто така го потпишува документот.
„Се договоривме да се ослободиме од одговорност, барање за надомест или каква било одговорност за какви било негативни последици кои можат да произлезат од планираната процедура, вклучително и компликации поврзани со породувањето, постпарталниот период, како и компликации поврзани со идна бременост и породување. Болницата, како и стручниот тим, ја ослободуваме од секаква одговорност во врска со последователни недоразбирања и спорови кои можат да настанат помеѓу пациентот и сопругот/партнерот“, стои на крајот од овој документ.
Од правен аспект, српскиот здравствен систем „се согласува на акушерско насилство“ со таков документ, коментира адвокатката Марина Мијатовиќ за медиумот.
„Врз основа на содржината на согласноста, која ја формулираше КБЦ Звездара, може да се заклучи дека српското здравство е свесно за акушерското насилство и се согласува на акушерско насилство, дека е свесно за сите последици од ова насилство и дека тоа го сака да се изврши“, смета Мијатовиќ, адвокатка за медицинско право.