Со 62 гласови „за“, 51„против’ и без „воздржани“ пратениците во Собранието вечерва ја изгласаа новата влада која ќе ја предводи премиерот Зоран Заев.
– Се обврзуваме чесно и одговорно да работиме, да имате подобар стандард и подобра перспектива за сите и за вашите деца. Ветувам правда за сите, ќе работиме на одговорен начин, ќе имаме модерно и европско образование, ќе работиме за уште посилно и поквалитетно здравство, ќе служиме чесно и одговорно и ќе бидеме сервис на сите граѓани во сите области.
Сега веќе немаме отворени етнички прашања, сите сме еднакви, ќе работиме еднакво за сите. Очекуваме економската соработка со соседите да расте.
Најавувам целосна посветеност на економијата и создавање на максимилизација на државните ресурси за поддршка. Ќе се посветмие на тоа младите да не бараат работа само во јавниот сектор, да гледаат перспектива и во приватниот сектор – рече Заев во своето обраќање пред гласањето за избор на новата влада.
Тој упати повик до младите да останат дома и да работат на европеизација на Северна Македонија, најави бескомпромисна борба против криминалот и корупцијата, како и брза помош на најсиромашните. Законот ќе важи еднакво за сите, а најодговорни мора д абидат функционерите, рече Заев.
Тој на опозицијата ѝ упати порака дека нема потреба да шири толку омраза и гнев и ѝ подаде рака за соработка на сите полиња, бидејќи како што рече Заев, така подобро ќе им служиме на граѓаните.
– Ако и понатаму немате став за ниту едно важно прашање, и ако понатаму тврдите дека црното е бело, а белото црно, ќе останете безбојни. Да ја надминеме злобата и да работиме заедно за европската иднина на Северна Македонија – ѝ порача Заев на ВМРО-ДПМНЕ во своето обраќање.