Неколку нови експлозии го потресоа кинескиот пристанишен град Тијанџин, а досега животите ги загубија 85 луѓе, пренесуваат кинеските медиуми. Во тек е големата евакуација на локалното население поради истекувањето на опасни отровни материи, а на местото на несреќата се распоредени војници во облека за хемиска заштита кои трагаат по евентуално преживеани.
Кинеската државна телевизија CCTV јавува дека станува збор за седум помали експлозии, чија причина не е позната, а има неколку помали пожари.
Вооружените полицајци започнале да го евакуираат локалното население откако на местото бил откриен натриум цијанид, неколку дена по големите експлозии во пристанишното складиште во кое се чувале лесно запаливи материи, а потоа избувна пожар кој пожарникарите три дена се обидуваат да го изгасат.
„Поради ширењето на отровни супстанции, населението близу таа зона е повикано да се евакуира“, објави агенцијата Ксинхуа.
Од утрото четири автобуси со луѓе веќе биле евакуирани, а зоната се протега на три километра од местото на експлозиите во средата кои имаа моќност од 3 и од 21 тон ТНТ.
Во експлозиите кои ги треселе зградите оддалечени и повеќе километри, загинале 85 луѓе, а 721 лице е повредени, од кои 33 се наоѓаат во критична состојба. Меѓу загинатите се 21 пожарникар.
Тијанџин е важен пристанишен град и еден од најголемите во Кина со околу 15 милиони жители, а се наоѓа на 140 километри југоисточно од главниот град Пекинг.