Граничниот премин „Црна Скала“ е од голема важност за жителите на Делчево од македонска и на Ќустендил од бугарска страна кај Делчево, а работите, сепак, цели 18 години не мрднале од мртва точка. За проектот во 2001 година се потрошија 1,7 милиони евра за пробивање, за тампонирање и за изградба на патот. Меѓутоа, како што вели делчевскиот градоначалник Горан Трајковски, подигнати се повеќе потпорни и заштитни ѕидови и останато е на тоа.
„Објаснувањето за стопирање на работите од македонска страна тогаш било дека проектот не е почнат од бугарска страна. Овој проект би бил од огромно значење за жителите од двете страни на границата бидејки со него се скратува патот до Софија за околу 40 километри и, секако, би бил од огромна корист за економски развој на регионот, вели Трајковски.
Во прилог на договорот за изградба на три мали гранични премини со соседна Бугарија што е потпишан пред 26 години, сепак, најблиску до целосна реализација е преминот „Клепало” кај Берово.
Според Трајковски, во 1993 година било договорено од македонска страна да биде изграден граничниот премин „Клепало“ кај Берово за двете погранични служби, а Бугарите презеле обврска да изградат граничен премин за двете гранични служби на преминот „Црна Скала“. Но, и покрај 26. поминати година не е изграден ниту еден од двата гранични премина, а релаксацијата на односите меѓу двете земји во последно време е причина за верување дека нештата, конечно, ќе се придвижат.