Во Белград синоќа се одржа нов протест „Еден од пет милиони“, а насобраните граѓани ја блокираа зградата на РТС под паролата „Доста ние ве гледавме, сега вие ќе не гледате нас“.
Пред РТС демонстрантите го изведоа перформансот „Дневник на слободна Србија“ во кој граѓаните ги читаат вестите и главна тема се информации за протестите, како контраст на информациите кои се пренесуваат преку јавниот сервис.
Како што најавија организаторите, “блокада на предупредувањето” е резултат на игнорирањето на барањата за професионално известување кои беа испратени до директорот на РТС, Драган Бујошевиќ и уредникот на информативната програма Ненад Љ. Стефановиќ кое беше испратено од страна на демонстрантите пред повеќе од еден месец.
Колегиумот на Радио Телевизија на Србија претходно соопшти дека со најавената блокада на зградата на РТС, организаторите „ја преминуваат границата која постои меѓу легитимните протести и нелегитимниот притисок врз сите вработени во јавниот сервис”. Одговорот од организаторите на протестот, беше дека ова не е притисок врз вработените, туку на раководството на јавниот сервис.
Пред граѓаните се обрати актерот Бранислав Лечиќ, кој изјави дека власта го дели народот и влева страв. Тој потсети на протестите во 91 година.
„Секоја власт помалку или повеќе станува корумпирана ако нема граѓанска свест. А таа граѓанска свест, тоа сме ние“
„Ги повикувам сите граѓани да се исправат, да го наполнат своето срце со енергија и никогаш да не признаат дека се уплашени, затоа што не смеат да бидат“, рече Лечиќ.