Протестите во Бугарија не запираат. Неколку стотици лица се собраа вечерва пред претседателската резиденција во Софија за да го изразат своето противење против одржувањето на предвремени избори во Бугарија.

Скандирајќи „Оставка, оставка“, бараа да им се обрати претседателот Росен Плевнелиев. Демонстрантите тврдат дека се против сите оние што „управувале со државата во последните 23 години“.

Во исто време, протести се одржаа и во Враца. Учесниците на собирот побараа да се распише референдум за свикување на Големо народно собрание, кое би донело нов Устав со кој би се променил политичкиот систем во Бугарија.

Со паролите „Победа“, „Ние сме народот, многу сме“, „Промена на системот“, демонстрантите побараа да нема никакви политички партии, државата да му се врати на народот, а пратениците да се избираат според мнозински изборен систем.

Паралелно со ова во повеќе градови се одржуваа и протести против чешката енергетска компанија ЧЕЗ. Од овие протести беше побарано преразгледување на изададените лиценци за работа на сите монополски компани и беше побарана одговорност „од виновниците за разграбувањето на државата“.