И покрај договорот за примирје и почеток на директни разговори помеѓу претседателот на Украина, Виктор Јанукович и опозициските лидери, денеска во Киев повторно дојде до судири, а светските агенции јавуваат дека имало десетина загинати цивили и заробени полицајци.
Стотици антивладини демонстранти и специјалните сили на украинската полиција повторно се судрија на плоштадот Мајдан во Киев. Демонстрантите, како што јавуваат агенциите, ги принудиле полициските сили да се повлечат за 200 метри и сега контролирале поголем дел од плоштадот.
Предходно беше договорено примирје меѓу претседателот Виктор Јанукович и опозициските лидери. Едниот од нив Арсениј Јацењук на страната на неговата партија напиша: „Јуришот врз Мајдан што властите го планираа за денеска нема да се случи“.
Според Кабинетот на претседателот Јанукович, примирјето било прекршено од страна на демонстрантите.
„Опозицијата го искористи периодот при преговорите за да добие на време, да се мобилизира и да собери оружје за демонстрантите“, се вели во соопштението на Кабинетот на претседателот Јанукович.
Немирите во Киев влијаат и врз спортот. Неколку членови на украинскиот олимписки тим се повлекоа од игрите во Сочи како протест поради крвавите пресметки во Киев.
Скијачката Богдана Мацоцка се повлече заедно со нејзиниот тренер и татко Олег.
„Како членови на украинскиот олимписки тим, сакаме да соопштени дека сме разочарани од потезите на претседателот Виктор Јанукович кој надежта на нашата земја ја претвори во крв место решавање на конфликтите низ преговори, како што се надевавме кога тргнувавме за Сочи“.
Претседателот на Олимпискиот комитет на Украина, Сергеј Бубка од спортистите побара да останат во Сочи и да покажат единство, но во исто време истакна дека го почитува правото на секој од нив сами да донесат одлука дали сакаат да останат или да се вратат во својата земја.