Неидентификуван новинар се маскирал како свештеник, за да може да влезе во болничката соба на легендата на Формула 1, Михаел Шумахер, јавува Гардијан, повикувајќи се на извештаите на германските медиуми.
Семејството и сите други луѓе блиски до Шумахер едноставно се навредени, коментирајќи дека тие не можат да поверуваат дека такво нешто некогаш може да се случи.
За инцидентот во своето обраќање пред новинарите алудираше Жерар Салиан, еден од водечките париски неврохирурзи, кој побара од нив да имаат сочувство за семејството и да не се наруши работата на болничкиот персонал само за да добие ексклузивно интервју.
“Ве молиме да не вршите притисок врз нас, ниту пак на семејството. Докторите не кријат ништо и нека работат во мир”, изјави доктор Салиан.
Последните вести говорат дека состојбата на германскиот тркачки шампион Михаел Шумахер се подобрува после операцијата која имаше цел да се намали притисокот врз неговиот мозок.
Опасноста се уште постои, не велиме ова е победа, велат докторите.
Во меѓувреме, семејството на Шумахер е покрај неговиот кревет, додека тој се бори за живот по скијачката несреќа на француските Алпи.
Менаџерот на Шумахер, Сабине Кем, рече дека неговата сопруга, Корина, ќерката Џина Марија и синот Мик се во состојба на шок во болницата во Гренобл.
Седумкратниот Формула 1 шампион претрпе повреди на главата во неделата при пад во одморалиштето во Мерибел.