Вчера во Истанбул беше промовиран видео записот за песната „Среќен роденден“ од новиот албум на една од најпознатите групи во Турција „Кан Бономо“. Автор на видеото, кое е изработено во техниката стоп анимација од глина и цртеж е Вук Митевски.
Музичкиот спот е продуциран од „Сестри и Брат Митевски“ продукција и „Калпазан“ продукција од Турција. Македонската јавност ја познава оваа група по нивниот евровизиски настап како претставници на Турција во 2011 година.
Спотот, во Турција предизвика позитивни реакции од медиумите и публиката, особено бидејќи ова е прв видео запис во Турција кој користи стоп анимација. Во турските медиуми се потенцира дека видеото е креирано во студио во Скопје, изминативе три месеци, без употреба на компјутерски елементи и во потполност е рачно изработен со над 5000 фотографии.
„Кан Бономо“ е група со завидна популарност во Турција. Спотот на Вук Митевски имал над 30 илијади прегледувања само за еден ден.
Вук Митевски е ликовен уметник и автор на неколку наградувани анимирани филмови, на пошироката јавност и’ е познат како автор на сценографијата и дизајнот на филмовите „Јас сум од Титов Велес“ и „Жената што ги избриша солзите“.