Градскиот трговски центар (ГТЦ), конечно, го доби најавуваниот зелен покрив. Проектот што почна да се реализира на почетокот на 2019 година, денеска беше свечено пуштен во употреба во присуство на градоначалникот на Скопје, Петре Шилегов, на градоначалникот на центар, Саша Богдановиќ и на претставници на ГТЦ.
Облагородениот простор е со површина од 1.800 метри квадратни и претставува ново катче за одмор и рекреација на жителите и туристите во главниот град. Поставени се клупи, направени се неколку водени зони со фонтана и базени, монтажна бина, кафе бар, има делови за паркирање на велосипеди, партерно шаховско поле и корпи за отпадоци. Засадени се 29 висококвалитетни дрвја и над 30 други видови на садници како делумно надополнување на зеленилото во реонот на т.н. Мал ринг што претрпе големи загуби во 2017 година.
Проектот зелен покрив на ГТЦ не мина без проблеми што, сепак, двата обида за демолирање не се одразија на времената рамка за финалниот производ. Во контекст на идејното решение, се отстрани и временскиот објект согласно одлуката на скопскиот градоначалник Петре Шилегов.