Денеска продолжува конститутивната седнива, на чиј дневен ред е избор на претседател, заменик на претседателот, членови и нивни заменици на Комисијата за прашања на изборите и именувањата.
Но на досегашните седум продолженија најмалку се дискутутираше за точките на дневен ред. Дебата главно се води меѓу пратениците на ВМРО ДПМНЕ и СДСМ за тоа кој ја кочи работата, а со тоа и изборот на претседател на Собранието и изборот на нова влада.
Во досегашните реплики, контра реплики и процедурални забелешки за кршење на Деловникот за работа на Собранието, ВМРО ДПМНЕ го условуваат изборот на Комисијата и на претседател на Собранието со тоа, пратениците од СДСМ да се откажат од Платформата на албанските партии, која наводно е прифатена за создавање на новото парламентарно мнозинство, или да се согласат на нови предвремени избори.
Пратениците од СДСМ и повремено од ДУИ, БЕСА и Алијанса на Албанците, ги обвинија пратениците од ВМРО ДПМНЕ дека прават циркуз во салата го штитат криминалот на нивните функционери, и го одолговлекуваат изборот на новата влада, а со тоа и нивното заминување во опозиција.
Конститутивната собраниска седница почна на 30 декември 2016 година, но беше прекината, затоа што не беше обезбедено парламентарно мнозинство за избор на претседател на Законодавниот дом.