Претседателот на САД, Барак Обама изрази сомнеж дали на рускиот претседател Владимир Путин може да му се верува како партнер за прекин на граѓанската војна во Сирија.
„Јас не сум убеден дека можеме да им веруваме на Русите и Владимир Путин, поради што ние треба да тестираме дали може или не да има реално прекин на непријателствата“, рече Обама на прес-конференција по состанокот со членовите на Советот за национална безбедност.
Според него Русија може и да не сака или пак да нема доволно влијание кај сирискиор претседател Ал-Асад за запирање на насилството.
„Затоа ние ќе тестираме. Ние не се впуштаме со затворени очи“, изјави Обама.
Последните информации од борбите околу Алепо се дека владините сили заземале контрола од бунтовниците на одредени места. Армијата на Башар Ал-Асад ги напаѓа бунтовниците со помош на руски воздушни напади.
Речиси 250.000 цивили живеат заробени во размената на пукотници од оружјето на бунтовниците и сиријската армија.
Според руската државна телевизија, во моментов имало отворено седум хуманитарни коридори преку кои се спасувале цивилите.