Претседателот на САД, Барак Обама денеска во своето неделно обраќање на нацијата порача дека воздушните напади врз џихадистите во Ирак ќе продолжат ако биде потребно да се заштитат американските дипломати и воени советници.
Тој рече дека ги одобрил нападите во Ирак за да се заштитат Американците кои се наоѓаат во Ербил на северен Ирак. „Ако биде неопходно, ќе продолжиме со нападите“, рече Обама.
Обама истакна дека одобрил „хуманитарна“ операција за достава на храна и вода за цивилите кои се кријат од екстремистите на планината Синджар во северен Ирак.
“Илјадници, а можеби и десет илјади Ирачани кои побегнаа в планина гладуваат и умираат од жед. Храната и водата која им ја фрливме од воздух ќе им помогне да преживеат“, рече Обама.
Тој порача дека главниот командант на американските сили нема да дозволи САД да бидат вовлечени во нова војна со Ирак и дека копнените американски сили нема да се врата во Ирак.
„Ние ќе продолжиме да спроведуваме поширока стратегија во Ирак. Ќе ги штитиме цивилите, ќе соработуваме со меѓународната заедница во решавање на хуманитарната криза. Ние ќе помогнеме овие терористи да бидат спречени да имаат траен безбеден рај од кој ќе можат да ја напаѓаат Америка“, рече Обама.
Исто така САД ќе апелираат да се помират ираќките заедници и заеднички да се борат против теорористите за народот на Ирак да има подобра иднина.