Во Основното јавно обвинителство Скопје во тек е истражна постапка за причините за смртта на 21 годишниот Никола Саздовски кој беше претепан на 29 јуни на автобуската станица во Автокоманда и за утврдување на одговорност на насилниците.
Според информации на НОВА, во ОЈО е веќе предаден обдукцискиот протокол за починатото момче.
Алсат ТВ објави дека во обдукцикиот наод пишувало дека Саздовски починал од повреди на мозокот.
Од ОЈО за НОВА изјавија дека истражната постапка е во тек.
„Се преземаат дејствија, а тоа значи прибирање на материјални и вербални докази. Потоа ќе следува анализа на сите прибрани докази и ќе се донесе јавнообвинителската одлука. Во тој момент ќе биде утврдена правната квалификација за делото. Дали ќе остане сегашната или ќе има друга, зависи од доказите кои ќе бидат прибрани. Но за тоа е се уште рано“, велат од ОЈО.
Ваквиот тек на случајот доаѓа по кривичната пријава што МВР ја поднесе до ОЈО Скопје според која напаѓачите требаше да одговараат за кривично дело „Насилство“, но тогаш Саздовски, иако во кома сѐ уште беше жив.
„Секторот за внатрешни работи Скопје поднесе кривична пријава против тројца осомничени сите од Скопје. По преземените мерки, прво и второпријавениот веќе се во притвор. Ќе замолам да не гледате етничка позадина, која многу често се користеше во минатото. Насилникот е насилник, ќе одговара, постојат закони, правната држава функционира“, рече Тони Ангеловски, портпарол на МВР.
Од таму објаснуваат дека настанот се случил во петокот на 29 јуни 2018 година триесетина минути после 17 часот а двајца од тројцата напаѓачи биле лишени од слобода наредниот ден, во сабота на 30 јуни. На сајтот на МВР во делот за Дневни билтени, кој се доставува и на е-меил адресите на медиумите, настанот е објавен исто така на 30 јуни. Во билтенот е потенцирано дека две лица, можни сторители се приведени во полициска станица. Истиот ден, СВР Скопје поднесе кривична пријава против три лица.
Информацијата за поднесената кривична пријава е објавена во понеделникот на втори јули.
На тројцата осомничени им е одредена мерка притвор во времетраење од 30 дена. Двајца од нив веќе се упатени на издржување на притворот а на третото лице кое за сега е во бегство му е изречена мерката притвор во отсуство.
Тројца напаѓачи на возраст од 19, 20 и 21 година, за сега се товарат за „насилство“. Двајца се во притвор, а по третиот полицијата сè уште трага. Притворените сè уште не се сослушани.
Никола Саздовски на 29 јуни беше физички нападнат од три непознати лица на автобуска постојка во скопската населба Автокоманда. Тие излегле од возило и го нападнале момчето кое било со неговата девојка. По десетдневна кома, Саздовски вчера почина на една од скопските клиники.
Во чест на Саздовски, неговите пријатели од навивачката група „Комити“ се собраа денеска на западната трибина на Градскиот стадион во Скопје по што се упатија пред Собранието и таму запалија свеќи во чест на Никола. Младото момче денеска беше погребано.