Собранието го објави огласот за избор на новиот состав на Комисијата за спречување на корупција.
Огласот ќе трае 7 дена, по што ќе следува и јавно интервју на кандидатите. Роковите за избор на првиот состав на антикорупциската комисија според новиот Закон се скратени за новата Антикорупциска комисија да се формира пред да започне кампањата за претседателските избори.
Интервјуата на кандидатите ќе се пренесуваат директно на МТВ, а ќе ги водат претставници од МАНУ, од Интерпарламентарната унија, здруженија на граѓани кои се занимаваат со антикорупција.
Во огласот пишува дека се избираат претседател на комисијата и шест члена со мандат од пет години. Тие нема да имаат право на повторен реизбор. При изборот, според новиот Закон за спречување на корупција и судир на интереси, ќе важи принципот на соодветна и правична застапеност и принципот на подеднаква родова застапеност.
Новиот Закон за спречување на корупцијата предвидува за претседател и членови на ДКСК да не може да биде избрано лице кое во последните 10 години било донатор на политичка партија, пратеник или член на Влада. Исто така, новите членови мораат да имаат шестгодишно работно искуство во областите на откривање или спречување на корупцијата, владеење на правото и да имаат завршено правни, економски, политиколошки или комуникациски студии.
Со новиот Закон за спречување на корупција и судир на интереси, ДКСК добива зголемени надлежности -Антикорупциска ќе ги следи промените на имототите на функционерите и по завршувањето на нивниот мандат, ќе проверува сомнителните грантови и тендери, ќе има увид во финансиското работење на партиите.
Антикорупционерите ќе имаат пристап до сите податоци што за функционерите ги има УЈП, МВР, Фонд за пензиско, Катастарот, Берза, Народната банка и до сите банкарски сметки.
Државната антикорупциска комисија не функционираше повеќе од 11 месеци по оставките кои ги поднесоа членовите на Комисијата поради сомневања за исплата на фиктивни патни налози и трошења на буџетски пари.