Пораз на Новак Ѓоковиќ во 2016 година претставуваше сензација, во 2017 година е најнормална работа. Српскиот тениски ас кој лани беше непобедлив, сега е трансформиран до непрепознатливост, па неговите фанови не можат да сфатат што се случува со поранешниот најдобар светски рекет.
Со свое мислење за новонастаната ситуација ка Ѓоковиќ се јави Богдан Обрадовиќ, екс селектор на Дејвис куп репрезентацијата на Србија, кој за шпанскиот весник „Марка“ даде појаснување за што станува збор.
„Новак целосно се истроши и го испразни своето тело. Почна да конзумира радикална веганска исхрана пришто го исклучи месото. Тоа е катастрофа. Мајкл Фелпс се „давеше“ во колачите и јадењата на баба му и уриваше рекорди. Влезен е во некои чудни приказни“, коментира Обрадовиќ.
Како најголем виновник за „чудните приказни“ го лоцира шпанскиот ментален тренер Пепе Имаз кој како да го опседна во последните година ипол. Ѓоковиќ почна силно да му верува, откако му помогна на неговиот брат Марко да се извлече од сериозна депресија.
„Јас бев првиот што имав проблеми со тој тип. Тој го убеди Новак дека исхраната е најважна што е тотално погрешно. Ѓоковиќ ја промени својата рутина и почна повеќе да медитира одошто да тренира. Играта во тенисот се менува ако промените рекет, замислете што се случува при промена на состојбата во глава. Јасно ми е дека семејството му е на прво место, но погледнете го Федерер. Има сопруга и четири деца и, пак, игра неверојатен тенис“, посочува поранешниот српски селектор.
Тој со куса опсервација на односот на Ѓоковиќ на терен во 2016 година и сега, но сподели и гласишта за враќање на српскиот тенисер на старите навики на што во неколку прилики во минатиот период апелираше и Борис Бекер.
„Ѓоковиќ знаеше да вика на терен, сега игра без емоции. Повеќе ја нема во него онаа компетитивност и енергија. Меѓутоа како што слушнав, повторно почнал да јаде нормално. ако е тоа точно, претпоставувам дека нешто се разбудило во него и верувам дека повторно ќе биде оној стариот“, заклучи Обрадовиќ.