Основното јавно обвинителство за гонење на организиран криминал и корупција денеска поднесе Обвинителен акт против едно лице за сторено кривично дело Трговија со дете од член 418 г став 2 во врска со став 1 од Кривичниот законик, додека две лица – корисници на сексуални услуги се обвинети за кривично дело Трговија со дете од член 418 г став 4 во врска со став 3 од Кривичниот законик.
Се работи за случајот со сексуално злоставуваното 13 годишно девојче од Домот „25 Мај“ во Скопје додека била под грижа на државата, што го обелодени Европскиот центар за правата на Ромите во февруари годинава.
ОЈО за случајот уште истиот месец отвори постапка, а Министерството за труд и социјална политика поднесе кривични пријави против 11 лица од надлежните институции – раководни лица во Центарот за социјална работа – Скопје за ,,несовесно работење во служба’’ и против стручни лица вработени во Центарот, за кривично дело ,,запуштање на малолетно лице’’, и за ,,несовесно работење во служба’’.
Против 18 годишен велешанец кривична пријава поднесе СВР Велес за полов напад врз дете.
Во мај годинава, надлежниот јавен обвинител од Основното јавно обвинителство за гонење на организиран криминал и корупција донесе наредба за спроведување истражна постапка за уште две лица македонски државјани инволвирани во случајот кои добија притвор.
-По спроведување на опсежна истражна постапка и прибирање на обемен доказен материјал, обвинителството утврди дека во период од почетокот на декември 2017 година до 06.02.2018 година, во Кавадарци, Радовиш, Штип и с. Мислешево – струшко, првообвинетата, со употреба на сила, сериозна закана и измама ја искористила немоќта на детето кое немало наполнето 14 години. Обвинетата заради експлоатација по пат на користење во сексуални активности, за паричен или друг надоместок ја превезувала, ја продавала, ја нудела на продавање, ја засолнувала и организирала присилен брак на детето.
Другите обвинети, иако знаеле дека детето е жртва на трговија со луѓе, ја искористувале и овозможувале на друг повеќекратно искористување за сексуални услуги, со што го сториле кривичното дело за кое се товарат.
Како резултат за злоупотребата, детето останало бремено и било принудено да ја прекине бременоста, се вели во соопштението од ОЈО.
Од ОЈО се истакнува дека поради постапките на обвинетите детето во одреден временски период имало нарушена здравствена состојба, душевно трпело и чувствувала физичка болка од нанесени телесни повреди.
Исто така Обвинителството бара и продолжување на притворот за тројцата обвинети.